雖然今次蘭茵篇嘅出版公司話可以呢個篇章可以玩到十六個鐘，但我用左十個鐘就爆左啦！我係咪好叻叻呢 =P 不過今個篇章真係正到爆！！！平時我絕不講 Game 嘅 Blog 都要忍唔住講下軒轅劍！
↑軒轅劍外傳雲之遙宣傳動畫
軒轅劍伍外傳雲之遙係今年一月上旬正式開售，不知不覺呢一隻 Game 已經存在係我部電腦已經四個月有多啦。記得一月果時係我最失意嘅時候 … 而呢一隻 Game 恰好就陪我挨過左果一段時間。更不可思議嘅係，我考 mock 期間都有玩呢隻 Game @@ 同學們日日係度咆書嘅時候我就打緊暮雲篇 = = 真係可笑！另一方面，呢一隻 Game 應該都係我人生第一次真正出錢買嘅一隻單人遊戲 =P 但我覺我係 200% 值得嫁！
有人話宜家啲電腦遊戲係新不如舊，啲舊 Game 往往可以令人一玩再玩，再三回味。而新 Game 只係賣畫面，係咁宣傳畫面幾靚幾靚，往往忽略左遊戲嘅趣味性。呢一個諗法，曾幾何時亦存於我心，但直到今日，呢個諗法已經被軒轅劍伍打破啦。
過去，我一直覺得係我玩過咁多 RPG Game 入面，軒轅劍參外傳天之痕嘅地位係近乎神。對於天之痕我都唔知重玩過幾多次啦！由玉兒嘅死，到小雪嘅犧牲，加上凄美嘅音樂，呢一隻 Game 已經深深係每一個玩過軒轅劍嘅人心入面留下烙印。十年過去，對入面每一個故事情節仍然清晰可見。原本以為冇可能有遊戲超越到天之痕嘅神級地位嘅時候，軒轅劍伍就出左啦。
記得開始玩軒轅劍伍時其實覺得冇乜特別，亦係一隻普通 Game … 故事設定係山海界，同過往一樣係打怪物、升 Level，睇動畫。一切故事都係圍繞住一個冇乜個性嘅主角 … 然後睇住佢地點樣拯救呢一個受盡「溫室效應」影響住嘅世界，最後打敗最終「魔王」天女魃。再睇住暮雲為左比天女明白當日黃帝將愛人天女封鎖於山海界時個心係幾痛，決定犧牲自己而變返軒轅劍，比天女見到劍身上嘅刻字 … 故事到尾聲時先有些少感動位 …
去到軒轅劍伍外傳漢之雲，故事主角變左三國時蜀國一個秘密愛國組織「飛羽」嘅隊長──朝雲 ..故事去到中間都有唔少感動位嘅，例如見到本來周瑜係孫權軍師，,但卻為左愛情，決定詐敗於諸葛亮而同巫山仙子私奔 … ( 唔要大喬 !? ) 另外，遊戲到左後期亦開始令人反思諸葛亮到底係唔係真係咁神 … 朝雲聽左被救返生嘅趙雲講嘅野後，明白到屢次北伐其實對蜀國造成左巨大負擔，國力亦已大不如建國之初，因此決定去說服諸葛亮比蜀國休養生息，但可惜諸葛亮為報劉備嘅知遇之恩，對於北伐一事堅持已見。另一方面，秘密組織其中一人竟然係仙子，年輕時仲要同諸葛亮拍過拖添，因為諸葛亮感到同名士之女黃月英結婚會更有利於自己嘅前途，因此決定同呢個女仔分手 … 但臨分手時，諸葛亮曾吩咐呢個女仔，如果他朝佢做出對蒼生有害之事時，務必要殺左佢 … 此時，呢對愛侶重逢，諸葛亮明白自己對劉備嘅承諾已經為人民帶來災禍，決定要呢個女仔返去命令飛羽暗殺自己 … 最後，飛羽係對諸葛亮落手時，一個除左髮色以外都同朝雲完全一樣嘅暮雲出現，更奇怪嘅係暮雲明明係效忠於魏國，但竟然保護諸葛亮 … 可惜，最後因朝雲同暮雲戰鬥時嘅劍氣大強，唔小心都係殺左諸葛亮 … 大結局係朝雲同暮雲合左體 = =”之後仲出發去左山海界救天女媽媽 … 漢之雲嘅劇情一定比正傳好得多，但 … 故事氣氛真係太沉重啦，令好多人玩玩下都覺得好似有啲係大時代嘅感覺 =(
最後終於黎到軒轅劍伍外傳雲之遙。今次主角係魏國名將張郃嘅入室弟子 ── 暮雲 … 其實一開始玩時真係覺得冇乜野特別，故事主要係圍繞住佢同佢幾好青梅竹馬嘅好友 ── 張誥、蘭茵之間嘅事 …另外亦因自己同魏皇係結拜兄弟，所以一直都好努力咁幫魏國做事 … 但最後張誥因為中蜀人嘅計，以為暮雲出左事，前去營救時被蜀人殺死 … 令暮雲憎死蜀國人。暮雲為左報仇不單殺死仇人兩夫婦，仲差啲連佢地個仔都殺埋 … 呢一對夫婦嘅好友因得知暮雲嘅事，又走去搵暮雲報仇 … 冤冤相報何時了？暮雲今次終於明白到呢個道理，放過左呢個人 … 故事亦都呢度就完左 … 雲之遙玩落真係好普通！但呢個係雲之遙嘅全部嗎？不！原來仲有另外三個篇章 … 而呢三個篇章正正就講解晒軒轅劍五入面所有伏筆，完整了軒轅劍五。
↑雲之遙－蘭茵篇宣傳動畫
去到最後嘅蘭茵篇，對於暮雲嘅身世、過去，對於蘭茵倆姊妹的來歷一切一切都慢慢明白了。玩左原來雲之遞要加上外傳先叫得上真正的雲之遙。哈，或者呢個就叫一雞三味啦！=P 對國家之情；對百姓之情；對恩人之情；對父母之情；對男女之情；對子女之情；對姊妹之情；朋友之情 …… 情，就係軒轅劍嘅中心。
一隻好嘅遊戲畫面質素雖然係重要，但故事內容、遊戲系統亦不可少！就好比小說唔會因為冇精美嘅圖片而冇人買。今次雲之遙我真係好滿意！記得軒轅劍參外傳係最後一隻以 2D 水墨畫做背景嘅軒轅劍，當時 2D 技術已經係發展得唔錯，過後好多年都有唔少玩家好懷念十年前軒轅劍參外傳嘅 2D 水墨畫嘅風格。出到軒轅劍肆開始第一次用到 3D 技術，然而我個人真係覺得頂佢唔順！啲人塊面起晒角點睇得落眼呀！？但軒轅劍肆外傳、軒轅劍伍、軒轅劍伍外傳中，3D 技術嘅應用一次比一次嫻熟，到左雲之遙更加應用左插畫黎講解某啲故事。3D 技術真係越睇越養眼 =) 仲有一段段 CG 片段，都令人非常刻骨銘心！一隻好嘅 RPG 遊戲，必須要讓玩家玩完之後過左好耐都可能記得整個故事，呢一點，軒轅劍伍做到了。
今時今日 Online Game 盛行，回憶返我第一隻玩嘅 Online Game 其實已與今時今日嘅 Online Game 大有不同。Online Game 嘅出現，係為左等玩家唔洗得自己一個人打機咁悶，可以同唔同嘅人一齊玩，一齊升 Level，升 Level 途中亦可以傾下計，傾下心得，同時亦可以同唔同嘅玩家鬥高 lv，網絡世界好大，但網絡遊戲就使人同人嘅距離拉近。係一個只有 ICQ 嘅時代，對於一個當時我未有 ICQ account 嘅我黎講，魔力寶貝係我嘅另頖 ICQ。
但近十年後，隻隻 Game 都係 Online Game，隻隻 Game 都係 3D，個個玩家都係靠外掛玩，原地練功，你有你練，我有我練嘅時候，Online Game 仲係 Online Game 咩？當一個個玩家都係頖似 NPC 嘅物體，當你叫極人都冇人應嘅時候，當你買野賣野都係 Set 做自動交易嘅時候，其實咁仲係唔係你當初玩 Online Game 嘅目的呢？遊戲公司生存係一個盜版氾濫嘅年代，單人遊戲一出已經被人制成盜版，正版 Game 賣 $150，盜版只賣 $20，遊戲公司仲點挨？Nature Selection，佢地只有將電腦遊戲進化成 Online Game，迫玩家買一條條 Key 先可以生存 … 其實講到呢被真係有啲無奈。
最後，相信軒轅劍伍外傳雲之遙將會係最後一代嘅軒轅劍啦，軒轅劍嘅神話，或者將只留傳係每一位玩過軒轅劍嘅玩家心中。
最後送上《軒轅劍外傳：雲之遙》主題曲「淚狂奔」
哈！可能今次文章真係太長添 -.- 打左好耐！
文章
0 留言:
發佈留言