記得係六月頭我仲做緊地產,後來因為拍左拖令自己嘅時間、洗費都突然用多左好多,靠份底薪根本冇可能陪到另一半出街玩,為左可以帶比另一半更多、令另一半更開心,毅然決定放棄繼續挨做地產仔... 今日,已經係我第二個星期返新工啦,呢份工人工唔係特別高,但至少叫做可以想買咩都買到,工作時間唔長,朝十晚六、準時放工,但最遺憾係已經得返自己一個人。
記得上月 18 號晚,返到屋企解開條錬時條鍊突然斷左,然後就一直放左係個櫃度,前幾日,我將條錬修理返好,但就冇再戴起過佢,或者係因為冇勇氣、或者係因為冇資格。記得當初送條錬比佢時我猶豫左好耐,而最後都係送左,因為我相信佢對我真心,但我仍不厭其煩同佢解釋點解我會送條錬比佢。只可惜結果往往強差人意。
或者,就讓月舞到此為止。
返工的第一個星期,我要接手舊人嘅日常工作,同時亦要根佢去巡一次公司旗下所有車場,識下公司嘅員工,感覺都頗新鮮。第二個星期,舊人正式離開左公司,奔向佢嘅將來,而我就要 handle 返晒佢所有野... 每日收數報數 check 數入數、因應唔同車場嘅需要要作出唔同安排,解決唔同問題等等。或者可以叫做由管理、人事、營運工作我都要一腳踢。舊人一走左就左就將佢本來凌亂嘅枱面執返好晒,然後就去百佳買左一大堆零食放入我櫃桶度 -.-" 公司一切都還可以啦,但都仲有兩點我係好接受唔到囉!第一就係部電腦太慢,開個網頁要 load 20 秒,但我個女同事竟然話冇問題啦 =.=" 第二樣就係啲文具嘅問題,公司幾乎所有文具都用大陸野,用起黎感覺勁差!逼迫我帶晒自己返學時啲文具返工 -.-" 仲有樣野幾搞笑,有次我入數,咁我入數啲錢就習慣用橡筋紮住。個銀行職員首先就解晒啲橡筋去數錢啦,數完之後就想用返啲橡筋紮返實啲錢放入櫃度啦,點知因為我地公司所有野都係用大陸野,質素奇差,啲橡筋都特別易斷!個職員一拉就斷一拉就斷,斷左二三次後嬲左,將我啲橡筋掃晒落垃圾桶度,用私伙野=.=" 諗起佢個樣都幾有麥仔發脾氣飛粉筆 feel!
| ↑執枱前 |
| ↑執枱後 |
份工辛唔辛苦?其實都真係唔算辛苦囉 =.=" 最少做得開心過返地產好多!
講返起地產... 今日舊時個同事打錯電話比我,同佢傾左幾句... 話說佢就比我細 2 年,由5月頭就已經開始返緊工... 同佢傾完知道佢到宜家仲未開到單,食緊老底 =.=" 其實 ... 我早走左係咪好事黎呢?如果我今日仲做緊地產,我又開唔開到一張單呢?定係會因為開唔到單比人小左幾鑊?真係唔知!
另外,上星期出完街返屋企時見返個舊朋友,一個好舊嘅朋友,計返都最有六年冇見過啦!突然有晚就係我買完 M 記返歸時撞見返佢。高左,大份左,就係我對佢嘅第一感覺,蒼桑左,應該就係第二感覺,但當佢一開口先發現佢內心轉變唔大,佢仍然係佢。
或者呢個世界就係咁,有緣就算分隔二地亦會再次共聚,無緣就算一齊得到都好快分開,或者唔需要過於為自己找尋下一個,如果有緣有份,下一個於下一秒就已經會係你身邊出現,一切最後亦要依靠命運安排。




