唐山大地震

　　唐山大地震，曾經係我中六時第一本為中化卷五而做嘅閱讀報告。由於當時我並未有細閱呢一本書，所以對呢本書嘅感覺唔深，更未有諗過地震為人帶黎嘅痛究竟有幾大。今日睇左唐人大地震嘅電影版，感覺深左，漸漸感受到自然災害為人類帶黎嘅痛。

　　錢鋼寫嘅唐山大地震，先講地震前唐山附近動物嘅怪異現象，然後再講及地震帶來嘅破壞、人嘅求生慾望、不同人之間嘅守望相助、衛生問題、遺孤嘅安置及最後論及國家地震局對事件處理嘅問題。而電影嘅唐山大地震對地震前、後所發生嘅一切只不過係輕描淡寫，更著重嘅反而係對地震中一對兄妹嘅分離、成長、發展，最後重聚呢一個嘅過程。或者就係咁，電影被嘅唐山大地震比錢鋼寫嘅唐山大地震更重人情味。

　　雖然幾乎每年總有一兩宗海嘯、地震等死傷數以十萬計嘅新聞，報章亦有大示標題呼籲為救災民慷慨解囊，但香港人始終對災難少左份切身處地之感。對於一般香港人黎講，巨型災難係一件遙不可及嘅事黎。係香港最多咪多打幾個風、多幾場火災、多幾場瘟疫姐，死傷點都唔過萬。或者就係咁，令香港人對自然災害少左份「認識」。對於災難，香港人只係以一個同情者嘅身份去幫助災民。

　　然而，電影中嘅一對兄妹曾因為大地震而險入鬼門關，佢地知道地震嘅可怕。最令我反思嘅係當家姐見到新聞報導講及四川大地震嘅時候，佢不安、惶恐、喊，然後立即提出要去災場幫助災民。

　　另外，呢齣戲都有樣幾得意嘅地方，就係佢真係將當時嘅生活盡量向觀眾展示左出黎。電影中雖然由頭到尾都冇提及過毛澤東，但毛澤東呢個名字卻處處可見，或多或少係表現出當時百姓對毛澤東嘅盲目祟拜。另外，佢地除左個電話以外，亦盡量保留左當時真實嘅日常用品如：電風扇、車、課本等，搞到連我呀媽睇完都諗返好多舊時嘅野 = =

　　最後，我比呢一齣戲 75 分。值得去睇 =]