分開兩星期的感想

　　終於開始慢慢醒覺，你並不屬於我。

　　分左手恰好兩星期，或者根本唔應該用分手二字，因為呢兩隻字我地由頭到尾都冇用對方講過。分開嘅頭幾日，時時刻刻都諗住你，好彩嘅係我仲有一班朋友支持緊我。果幾日過左後，生活回復當初嘅平淡，以為從此以後對可以將你放低。然而，呢幾日我再一次諗起你，感覺比當初分開時更強烈。

　　其實都好可笑，相初都未夠了解對方，大家已經一齊左。直到果一日嘈完之後，我先至開始嘗試去了解你。其實一諗到呢度真係百感交雜，身為男朋友，無盡力去支持你嘅目標，甚至亦忽略左佢係你心目中嘅重要性；唔了解你個性；冇試過去接觸你最心底嘅領域，只係獨孤一味的想氹你開心，比到開心你，但就忘記左每個人對開心嘅定義亦有所不同。只可以講，我呢個男朋友做得亦算相當失敗。

　　呢兩日問緊自己一個問題，就係點解19號果日對你未有挽留呢？回想當日，我聽完你心中嘅牽掛之後，我呆左，因為你嘅牽掛恰好就係另一位Leo之前叫我留意嘅野，然而我對你太唔了解啦。之後亦完全諗唔起可以挽留，只係識得講「我送你返去先啦」呢啲說話。最神奇嘅係，果日Kaspar陪完我散心後，我獨自返到屋企，當我除低我地條鏈時，條鏈就斷左啦 ...... 係巧合定係命運呢？

　　記得之前，每一次抱你時總會聞到你身上面嘅獨特氣味，開始時真係有啲覺得唔係太習慣，但後來同你抱多左反而覺得幾香，然後更加愛上左果一陣味。因為果一陣就係月舞嘅氣味。只係宜家再想聞都冇可能再聞到啦 ......

　　哈，其實酒店果晚真係好難忘，我竟然會先後對住一個唔識嘅人同埋你哭訴...... 過去，我就算喊我亦都唔會比人發現，但今次真係忍唔到 ... 仲記得果晚你幫我將我亂放嘅衫褲放好，係我沖涼前又主動拎衣架比我放衫，呢啲小事反而係我一生中最追求的事。只係 ...... 果時我個心太亂啦，我從未試過個心咁十五十六，只係知道係時候要同你講下大家嘅相處問題 ......

　　15號當日，我做左我畢生最愚蠢嘅事。當晚你捉住我隻手叮嚀我返去時要小心啲，果下我先發現果個 sms 我 sd 錯左。對唔住... 我甩開你手只係因為唔想你再一次見到我喊 ... 就係一轉身果下，我已經流緊眼淚啦 ...

　　自兩星期前開始，身邊多左好多人，自己亦有去識過人，但識嘅人越多，越係對你放唔低，因為發現你係咁多個入面最能夠令我動心果一個 ......

　　宜家嘅我可以做啲咩呢 ...？一直希望將自己變成一個完美嘅男朋友，點知越做越錯。或者，對愛情，我仍然太過無知。或者，我根本不配擁有你。